عبد الحق خدرا

كْبَرْ شْجَرْ ** فَرْقُوا زْهَرْ
صْرَطْتْ سْكَاتِ
فَــادْوَاخَلِ سْمَعْتْ غْوَاتِ
بْغِيتْ رَزْقِ يْكُونْ نْقِي
نَدِّي فِيهْ حَقِّي
وَنْكُونْ حْسَنْ مَنْ كُلّْ شْقِي
شْقِيتْ نْشُوفْ
لْقِيتْ رْجَالْ
رْكَبْهُمْ الْخُوفْ
مَنْ لْخُصَّة هَـِّزيتْ مَا لَّوْضُو
تْـَوضِّيتْ وَلْبَسْتْ سَلْهَامْ
رْكَبْتْ عَوْدْ الصّْبَــرْ
وَتْحَـزَّمْتْ بَسْوَايَعْ الْوَقْـتْ
نْدَكْ عَالَّحْجَــرْ
مَنْ فَمِّي خَـرْجَتْ احْكَامْ
طَــارْ الْفَــرْكّْ
قُـلْتْ رْجَعْ آآآآآلَحْمَامْ
الرَّعْدْ ضْــَربْ
وَالسّْمَا رْكَبْهَا لَغْــيَــامْ
خُوفِي عْلِيهْ
الضّْـرَبْ الْـبَــرْقَة
وَتْجِي فِيهْ الدَّقَّة
وْصُورْتُـو فَادْرَاعِي
نْحَطّْهَا وْشَامْ
بَالْحَرّْ شْكِيتْ عَالَّغابة
جَـدْبَـتْ لَـشجار
لْطيار هَاجَتْ **ضَارَتْ فْـرَاجَا
لَبَازْ حَرَّكْ جْنَاحُو وَبْرَزْ
عَجْبَاتُ الشَّطْحَة
وَبْدَا يَتْهَزّْ**عَاجُ أبَانْ بَزَّزْ
الضَّحْكَة عْرَاضَتْ
الدَّمْعَة فَاضَتْ
حَتَّى عَمْرُو كْفُوفْ
قُـلْتْ رْجَعْ آآآآآآلَحْمَامْ
الْقَـلْبْ عْلِيهْ مَخْطُوفْ
مَخْطُوفْ مَنْ الدَّنْيَا
وَسْوَايَعْ لِيَّامْ
لِيَّامْ مْرَا كَْلاَّبَة
نْهَارْ تَزْيَانْ**تْبَيْعَكْ الصَّابَة
ِويلاَ كَانَتْ مْرَا حَقّْ
لاَشْ كَا تْـدِيـرْ كِي لْحُوتْ
وْتَـزْهَقْ
وَرْجَعْ آآآآآآلَحْمَامْ
الدَّنْيَا فَـتَّــانَة **عْيُونْهَا بْرَقْ
وَدْمُوعْهَا شْتـَا
نْعَسْ وْفِيقْ بْحَالْ لَمْنَامْ
لَمْنَامْ مْفَسَّرْ
إلَى سَوَّلْتُونِي ثَانِي
نْـقُـولْكُومْ الدَّنْيَا تْـوَانِي
وْيَكْذَبْ عْلِيكُمْ الْكَذَّابْ
لَلِّي يْقـُولْكُومْ عَايَشْ فِيهَا هَانِي

فاس  16/05/2016